اعلانات جوجل ادسنس



يعني ايه ادسنس؟

فيه ناس كتير عايزين يعملو اعلانات علي الانترنت، و طبعا انت عارف ان جوجل هو اكبر موقع علي الانترنت، و ده بيخلي الناس تثق فيه و يكونو عايزين يستغلو نجاحه… علشان كده اصحاب الشركات و المواقع عايزين يعملو اعلاناتهم عن طريق جوجل!

لكن مين هيعمل اعلانات علي صفحه جوجل؟ ايه مجال الشركه اللي هتنزل اعلان علي جوجل؟ شركه استثمار عقاري؟ شركه تحويل اموال؟ شركه بتنتج اجهزه تخسيس؟

دي المشكله ان جوجل ملهوش اي علاقه بالمجالات دي، فقرر جوجل انه ياخد من الناس دي الفلوس و ياخد اعلاناتهم، لكن ميحطهاش علي موقعه، لا يحطها علي مواقع ناس تانيه ليها علاقه بالمجال بتاع الشركات دي… يعني لما يكون عندك موقع عن العقارات، جوجل هيبعت لك اعلانات عن شركات استثمار عقاري. لو عندك موقع عن الصحه و التخسيس، جوجل هيبعت لك اعلانات عن اخر اجهزه و طرق التخسيس! و كل لما الناس هتشوف و تدخل علي الاعلانات دي، جوجل هيدفع لك فلوس علي حسب عدد زوار موقعك!

هو جوجل مجنون علشان يبعت لي فلوس البيت؟ لا طبعا ، جوجل مش مجنون، لأنه بياخد 40% من مكسب الاعلانات بتاعتك! بس عموما الـ60% الباقيين فيه ناس كتير جدا في العالم عايشين عليهم !

المهم ازاي اضمن اني اكسب فلوس علي جوجل ادسنس؟

1 خلي موقعك مركز علي موضوع واحد! جوجل مش بيخلي بني ادم يدخل علي موقعك و يشوف هو عن ايه و بعدين يبعت لك اعلانات تناسبك. لأ، جوجل بيبعت برنامج كمبيوتر يدخل علي موقعك و يشوف ايه اكتر الكلمات اللي مكتوبه فيه ، مثلا لو لقي ان كلمه “رياضه” مكتوبه كتير، هتلاقي انه اوتوماتيك هيبعت لك اعلانات عن الرياضه “ملابس رياضيه، مباريات كره قدم، اعلانات عن قنواة رياضيه… الخ” . لكن مثلا تخيل ان لو انت موقعك عن خمسي موضوع، صفحه بتتكلم علي الرياضه و صفحه بتتكلم علي العربيات (السيارات) و صفحه بتتكلم علي الكمبيوتر و صفحه بتتكلم عن المطبخ! جوجل مستحيل يعرف يركز علي نوع واحد من الاعلانات، هتلاقي ان في صفحه الرياضه ممكت تلاقي اعلانات عن المطابخ الحديثه! و ده طبعا مش هيهم القراء بتوع الصفحه دي، علشان كده محدش فيهم هيضغط علي الاعلان! و بكده يكون الادسنس فشل في موقعك…

2 اجذب زوار علي قد ما تقدر لموقعك! تخيل نسبه الناس اللي بتضغط علي الاعلانات قد ايه؟ من 2% لـ 10% !! ده معناه ان لو انت بيدخل لك 1000 زاير في اليوم علي موقعك، تقريبا خمسين واحد هيضغط علي الاعلانات! و ده طبعا رقم صغير للأسف… ده معناه انك عايز زوار كتير علي قد ما تقدر! و مش اي زوار وخلاص، انت عايز زوار مهتمين بالمجال بتاعك! اضغط هنا علشان تعرف ازاي تجيب زوار كتير لموقعك

3 حط صور جنب الاعلانات! انا مش متأكد اذا كان الجوجل دلوقتي بيقبل الموضوع ده او لا، لأن كان الاول بيمنع الناس انها تحط الاعلانات جنب فيديو او صور تلفت الانتباه. لكن دلوقتي كل يوم بنشوف مواقع اكتر و اكتب تحط صور جنب الاعلان، و ده غالبا بيزود عدد الناس اللي بتضغط علي الاعلانات بنسبه 400% احيانا، علشان بيعتقدو ان الاعلان ليه علاقه بالصوره! لكن دي طريقه مش امينه!

4 لو عندك موقع افيلييت او محل اونلاين و المبيعات كويسه، متحطش اعلانات جوجل خالص! محدش عايز يضحي بمكسب كبير علشان مكسب صغير.. توافق انك تضيع زبون ممكن يكسبك عشره دولار مقابل اعلان بتكسب منه انت اتنين سنت؟ فكر تاني في الموضوع ده و شيل كل الاعلانات اللي علي مواقعك التجاريه لفتره شهرين مثلا، و شوف هل المبيعات هتزيد وللا لا!

5 قلل الاعلانات و زود المحتويات! فكر في الموضوع ده! لو انت زرت موقع لقيت فيه اعلانات كتير جدا و مفيهوش اي معلومات او محتويات مفيده، هل هتدخل تاني الموقع ده؟ غالبا لا! حاول تخلي موقعك مهم جدا بالنسبه للزوار، ووقتها بس هيزيد عدد زوارك و هتزيد ارباحك.

6 حط اعلانات الجوجل في الاماكن اللي فيها زوار اكتر! نفترض انك كتبت مقاله في موقعك و المقاله دي بيدخلها كل يوم 5000 زائر يقروها! و بقت هي اكبر مقاله مهمه عندك في الموقع و بقت تظهر كتير في البحث! حاول انك تحط اعلانين جوجل، اعلان في اول المقاله و اعلان في اخر المقاله.. بلاش تقسم المقاله نصين و تحط الاعلان في النص لأن ده هيأثر علي القاريء سلبا. لكن لما القاري بيخلص المقاله بيكون عنده استعداد انه يضغط علي اختيارات تانيه، و ده وقتها هييجي دور الاعلان اللي في اخر المقاله! بالمناسبه انت ممكن تعرف بالظبط الزوار بيدخلو علي انهي صفحه في موقعك عن طريق خدمه الاناليتكس من الجوجل. هاكتب عنها مقاله مره تانيه بالتفصيل.

7 متعدلش كل شويه مكان و نوع الاعلانات! ده هيخليك تركز اقل علي شكل الموقع و محتواه. و هتمنع الناس انها تتعود علي شكل موقعك! حاول انك تخلي الموقع شكله ثابت و تسيب الاعلانات تشتغل لوحدها، ووقتها بس هيزيد زوارك و هيزيد ربحك !

8 اسأل جوجل لما يكون عندك مشكله! فيه ناس كتير بتحس ان مينفعش نسأل الشركات الكبيره الاسئله اللي علي بالنا، علشان الشركات الكبيره معندهاش وقت لينا! لكن ده غلط، احنا اللي بنعمل الشركات الكبيره و هم غالبا بيهتمو بينا و بافكارنا. لما يكون عندك اسئله او حاجه مش فاهمها اكتب لجوجل و اسأله عليها! جوجل عنده ايميل برضه! adsense-support@google.com

9 اكتب موقعك كله بلغه واحده! لو انت عامل موقع عربي حاول متكتبش اي لغه تانيه غير العربي، لو موقعك انجليزي يبقي متكتبش غير بالانجليزي..لأن الجوجل هيتشتت و هيبدأ يظهر اعلانات بلغات تانيه، و الاعلانات اللي بلغات اجنبيه غالبا القراء مش هيفهموها… و دي اكبر مشكله بتواجهني في موقع عندي لتعليم اللغه العربيه، فيه اعلانات كتير جدا بالعربي بتظهر، علي الرغم من ان معظم القراء مش بيعرفو عربي لانهم مبتدئين!

10 زود الكلمات اللي انت عايز اعلانات تظهر عليها! لو انت موقعك مثلا عن تعليم اللغه الصينيه، حاول تركز قوي علي كلمه “اللغه الصينيه”. كل ما تكتب مثلا “اهم حاجه في اللغه هي كذا و كذا” اكتب “اهم حاجه في اللغه الصينيه هي كذا و كذا”

مقالات مهمه عن الجوجل ادسنس:

طريقه تركيب اعلانات الجوجل ادسنس علي المدونه او الموقع

اهم ادوات تحتاجها علشان تدير و تراقب اداء اعلانات الجوجل ادسنس في بيتك او علي تليفونك و انت في الشارع!

اعلانات جوجل ادسنس علي مدونه الوردبرس! Adsense tools for WordPress

Advertisements

One Comment

  1. Posted February 28, 2012 at 5:30 pm | Permalink

    please


3 Trackbacks

  1. […] اول نصيحه قانونيه لمستخدمين التشيتيكا و الجوجل ادسنس علي نفس […]

  2. […] 14) 4 المنتدي يعني فلوس اكتر و اكتر! تخيل لما تحط اعلانات الجوجل ادسنس علي المنتدي، و تبدأ تجمع فلوس كل شهر منه لمجرد ان […]

  3. […] طريقه تركيب اعلانات الجوجل ادسنس علي الموقع او المدونه قبل ما ابدأ بالخطوات التفصيليه، افضل لك انك تقرا المقاله دي، فيها نصايح عن استخدام الجوجل ادسنس […]

Post a Comment

Required fields are marked *

*
*

%d bloggers like this: